இல்லையென்று சொல்ல மனமில்லை

 
விண்ணில் நீ சென்றாலும், கண்ணில் நீ வாழ்கிறாய்,
மண்ணில் உன் நினைவுகள், தீபமாய் எரிகிறதே...
அன்பெனும் பாடம் தந்து, அறிவெனும் பாதை காட்டி,
சென்ற வழி யாவும், உன் நிழலாய் தொடர்கிறதே...
அப்பா... உன் நினைவு எங்களை வாழவைக்குதே...

இல்லையென்று சொல்ல மனமில்லை - நீ
எங்களோடு வாழும் தெய்வமல்லவா?
மறைந்தாலும் நீ தந்த பாசம் - என்றும்
மறையாமல் எங்களைக் காக்கும் அல்லவா?
என்றும் உந்தன் அன்பு வாழும்... 
நெஞ்சில் உந்தன் நினைவு சூழும்...!
 

காலங்கள் ஓடினாலும், உன் பாசம் மாறுமோ?
கண்ணீரின் துளிகளில், உன் முகம் மறையுமோ?
நீ தந்த தத்துவங்கள், நெஞ்சினில் ஆழமாய்,
வழிநடத்தும் தெய்வமாய், வாழ்கிறது காலமாய்...
உன் பாத சுவடுகளில், எங்கள் பயணம் தொடருதே...

மறைந்தாலும் மறையாத, மாபெரும் காவியம் நீ,
பிரிந்தாலும் பிரியாத, பாசத்தின் ஊற்று நீ...
இன்று உந்தன் பிறந்தநாளில், நெஞ்சார வணங்குகிறோம்,
என்றென்றும் உன் நினைவை, நெஞ்சினில் தாங்குகிறோம்...
ஆறாத அன்போடு, உன்னை என்றும் நினைக்கிறோம்...

உடல்மட்டும் பிரிந்தது ஏனோ? - உன்
உயிரல்லவா எங்களை இயக்குது?
காலத்தின் சக்கரம் சுழன்றாலும் - உன்
ஞாபகம் நெஞ்சை உருக்குது...
நீ எங்கு சென்றாய் அப்பா? - உன்
நிழலையாவது தந்து போப்பா...!

விழி மூடினாலும் உன் முகம் தோன்றுதே...
வழி எங்கும் உன் குரல் கேட்குதே...
காலம் கடந்தாலும்... பிரபஞ்சம் அழிந்தாலும்...
அப்பா... உந்தன் அன்பு...
எங்கள் மூச்சாய்... என்றும் வாழுமே...
வாழுமே... என்றும் வாழுமே...!